Сэтинньи 13 күнүттэн саҕалаан Булуҥ улууһугар Өрөспүүбүлүкэтээҕи киин элбэх хайысхалаах оҕо быраастарын биригээдэтэ үлэлиир. «Мобильнай биригээдэ» быраастара ыраах сытар нэһилиэгинэн сылдьан, ол эбэтэр Күһүүр, Сииктээх, Бороҕон, Хара-Уулаах кыра пациеннарын көрдүлэр-иһиттилэр, сүбэ биэрдилэр.
«Булуҥ улууһугар биэс нэһилиэги кэрийэн бүгүҥҥү күн туругунан, уопсайа, төрүөхтэриттэн 17-гэр диэри саастаах 615 оҕону хабан көрдүбүт. Сүрүн сыалбыт — ыарыыны эрдэттэн сэрэтии, кыра оҕо доруобуйатыгар кутталлаах ыарыылар бастакы көстүүлэрин эрдэ булан, кэмигэр эмтэнэригэр ууруллар», — диир педиатр-быраас Анжелика Матвеева.
Билигин быраастар Таймылыырга үлэлииллэр, салгыы Быыкап уонна Тиксии олохтоохторун туругун чинчийиэхтэрэ. Хомойуох иһин, улууска халлаах туруга мөлтөөн, тыал түһэн бөртүлүөт көппөккө үлэ графигыттан хаалаллар.
Ол гынан, кинилэр таах олорботтор. Быыс булан оҕолорго лекция ыыталлар. Холобура, Күһүүргэ оскуола оҕолоругар табах киһиэхэ хайдах дьайарын, хаан уонна тиис ыарыыларын туһунан Евдокия Монастырева кэпсээтэ.
Онтон эндокринолог быраас Лилия Посельская оҕоҕо йод тиийбэтэ туохха тиэрдэрин кэпсээтэ, ону тэҥэ травматолог быраас Илья Орловскай бастакы көмөнү хайдах оҥорорго үөрэттэ.
Мобильнай биригээдэҕэ психиатр, офтальмолог, невролог, эндокринолог, кардиолог, ортопед, уролог, лор, УЗИ бырааһа, икки педиатр уонна икки медицинскэй сиэстирэ сылдьан үлэлииллэр.
Анжелика Иннокентьевна этэринэн, бастатан туран, пациент регистрация ааһар уонна баҕалаах бырааһар көрдөрүнэн сүбэ-ама ылар, быраас анаатаҕына ревмопробаҕа уонна гормоҥҥа анаалыс туттарар. В уонна С гепатит анаалыһын 14-тэн 17-лээх оҕолортон туталлар.
Онтон Таймылыырдааҕы участковай балыыһа медицинскэй сиэстирэтэ Лукерья Павлова иһитиннэрбитинэн, мобильнай биригээдэ быраастарыгар барыта 199 оҕо көрдөрүннэ.
Элбэх хайысхалаах оҕо быраастарын биригээдэтэ Булуҥ улууһугар бастакытын кэлэн үлэлиир. Бастатан туран кинилэр доруобуйаларынан хааччахтаах уонна учуокка турар оҕолорго боҕомтолорун уураллар.
Бу бырайыак Ил Дархан Николаев көҕүлээһининэн ыарыыны эрдэттэн сэрэтии, ону тэҥэ оҕо доруобуйатыгар кутталлаах ыарыы бастакы көстүүлэрин эрдэ булан кэмигэр эмтэнэрин туһугар үлэлиир.
Я. Иванова