Кыайыы күнүн көрсө Тиксиигэ мас тардыһыытыгар турнир буолан ааста. Бу күн А.Н. Чилингаров аатынан “Дьулуур” култуурнай спортивнай комплекс спортивнай саалата толору ыалдьааччынан симиллибит. Манна илиилэригэр күүстээх эр бэрдэрэ мас былдьаһан күөн көрүстүлэр.
Турнирга барыта 16 бөҕөс кыттыыны ыллылар. Кыттааччылар бары да кыахтаахтарын уонна бэлэмнээхтэрин көрдөрдүлэр. Ол да буоллар тыҥааһыннаах киирсии түмүгүнэн кыайыылаахтар билиннилэр.
Ол курдук, 65 киилэ ыйааһыҥҥа Емельянов Святослав Харайбатов Дениһы кыайан 3-с миэстэҕэ тигистэ, иккис миэстэҕэ Фарид Айдемиров Иннокентий Корякиҥҥа хотторон таҕыста, онон 65 киилэ ыйааһыҥҥа кыайыылааҕынан Иннокентий Корякин буолла.
75 киилэ ыйааһыҥҥа Герман Гурьев Владимир Корякинтан маһын былдьаан бастакы миэстэни ылан кыайыыны ситистэ, онон Владимир Корякин иккис миэстэ буолла, үһүс миэстэҕэ Петр Рукавицин таҕыста.
75 киилэ ыйааһынтан үрдүк киирсиигэ үһүс миэстэҕэ Куличкин Дмитрий Алексей Корякины кыайан таҕыста, иккис миэстэ Күндүл Васильевка тигистэ, онтон бу ыйааһын муҥутуур кыайыылааҕынан Владимир Петров буолла.
Дьэ бу кэннэ эр бэрдэрэ “Абсолюткаҕа” кииристилэр. Бу киирсиигэ Дмитрий Куличкин тэҥнээҕин булбакка биир дойдулаахтарын холкутук кыайан чөмпүйүөн аатын ылла.
Күрэх түмүгүнэн кыайыылаахтар грамотанан уонна кыра бириистэринэн наҕараадаланнылар. Турнир олус тэрээһиннээхтик, интэриэһинэйдик, үрдүк таһымҥа ааста.
65 киилэ ыйааһыҥҥа кыайыылаахтар
75 киилэ ыйааһыҥҥа кыайыылаахтар
75 киилэттэн үөһээ ыйааһыҥҥа кыайыылаахтар
Я. Иванова