Кыһын хоту сиргэ – ОДьКХ уонна энергетика үлэһиттэригэр уустук кэм. Булуҥ улууһа буурҕатынан өрөспүүбүлүкэҕэ эрэ буолбакка, бүтүн дойду үрдүнэн биллэр. Тыал күүһэ ардыгар 30-32 миэтирэ сөкүүндэҕэ тиийэр. Бу күннэргэ оскуола оҕолоро үөрэммэттэр, уһуйааннар эмиэ, ону таһынан тохтобула суох производствоттан тутулуга суох үлэлээх дьахталлар эмиэ тахсыбаттар. Арай буурҕаттан толлубакка, тымныыттан чаҕыйбакка, ОдьКХ, энергетика эйгэ үлэһиттэрэ күүһүрүллүбүт режимҥа күнүстэри-түүннэри үлэлииллэр. Маннык биир тутаах тэрилтэнэн Тиксиигэ буолар Аварийнай-диспетчерскай сулууспа. Бэлиэтээн эттэххэ, тэрилтэ Тиксии-3 дьиэлэрин эмиэ көрөр.
Бу сулууспа дьоно квартираларга, подъездтарга саахал таҕыстаҕына кылгас кэмҥэ аварияны туораталлара сүрүн эбээһинэстэринэн буолар, холобура, тэстиини туоратыы уонна ириэрии үлэлэрэ. Ону таһынан, элбэх кыбартыыралаах дьиэлэр электрикатын эмиэ көрөллөр, холобура, подъездка эргэрбит проводканы уларытыы уонна подъезд иһинээҕи уоту көрүү кинилэр эбээһинэстэригэр киирэр.
Күнүстэри-түүннэри диспетчерскай сулууспа оператора уонна аварийнай-чөлүгэр түһэрэр слесарь дьуһуурустубалыыллар, киирбит заявканы толороллор. Ортотунан күҥҥэ 15-20 кэриҥэ заявка киирэр эбит, сорох ардыгар элбиир.
АДС маастара Николай Попов кэпсииринэн, буурҕа кэмигэр үлэһиттэр ордук күүһүрбүт режимынан үлэлииллэр. Маннык кэмнэргэ дьонтон заявка да киирэрэ элбиир, холобура, стояк тоҥмутунан сибээстээн, тымныы уу сүтүүтэ эриэккэһэ суох көстүү буолар. “Маннык түгэҥҥэ дьон АДСка эрийэн, диспетчерга заявка хаалларар. Оччоҕо төһө кыалларынан кылгас кэм иһигэр үлэһиттэрбит аадырыһынан тиийэн, батареяны ириэрэллэр, — диэн чопчулуур Николай Сергеевич. — Ону таһынан сорох олорор дьиэлэргэ өр кэмҥэ өрөмүөн ыытыллыбатах буолан, үлэбит эмиэ уһаан, харгыстанар түгэннэрэ бааллар”.
Николай Сергеевич – Намтан төрүттээх, Тиксиигэ кэлбитэ номнуо уонтан тахса сыл буолбут, оператор ЭВМ үөрэхтээх. ОдьКХ салаатыгар үлэлээбитэ 10 тахса сыл буолбут, онтон маастардаабыта – сэттэ.
Уопсайа АДСка 19 үлэһит баар. Олортон биирдэстэринэн слесарь Мичил Павлов буолар. Эдэр киһи Бороҕон нэһилиэгиттэн төрүттээх, элбэх оҕолоох ыал аҕата. ОДьКХ эйгэтигэр үлэлээбитэ номнуо 10 сыл буолбут, үөрэҕинэн – электрик.
“Үлэлиирин устата Мичил Андреевич бэйэтин үчүгэй эрэ өрүттэрин көрдөрдө. Ол курдук, кини АДС уопуттаах специалиһа, эппиэтинэстээх үлэһитэ. Бэйэтин үлэтигэр үрдүкү таһымнаах профессионал, төһө да эдэр буоллар, тэрилтэ киэн туттар үлэһитэ”, – диэн кэпсиир маастар Николай Попов.
Санатар эбит буоллахха, эдэр киһи 2019 сыллаахха АДС начальнигын Вадим Матвийчугу кытта «Лучший сантехник. Кубок России 2019-2020» VIII профессиональнай таһым чемпионатыгар ОДьКХ хамаандатыгар киирэн кыттыбыта.
Александра Стручкова