Булуҥ улууһугар таба ахсаана “Булунскай” муниципальнай унитарнай тэрилтэтиттэн саҕаланна. Бу туһунан оройуон сэбиэтин дьокутаата Любовь Семеновна Бурцева иһитиннэрдэ.
Тыа хаһаайыстыбатын боппуруостарыгар боломуочуйалаах дьокутаат Любовь Бурцева иһитиннэрбитинэн ахсаан 4-с нүөмэрдээх ыстаадаттан олунньу 18 күнүттэн саҕаланан түөрт ыстааданы кэрийэн бу күннэргэ түмүктэннэ. Бу улахан тэрээһиннэргэ эппиэттээх исписэлиистэр тиийэннэр, миэстэтигэр үлэни-хамнаһы билсэллэр, табаһыт олоҕун, таба иитиитин туһунан атах тэпсэн олорон кэпсэтэллэр, санааларын атастаһаллар.
“Ахсаан ааҕыытын ыраах сытар ыстаадатыттан саҕалаатыбыт. Мин тыа хаһаайыстыбатын боппуруостарыгар боломуочуйалаах оройуон сэбиэтин дьокутаата буоларым быһыытынан, саас уонна күһүн харааллааһын кэмигэр ыстаадалары кэрийсэн ахсааҥҥа сылдьыһабын. Биһиги үлэбит манан эрэ муҥурдаммат, ыстаада үлэһиттэригэр нэһилиэк, оройуон сонунун тарҕатабыт, Күһүүргэ буолбут тэрээһиннэри, ол эбэтэр кэнсиэр, киинэ хард-дискэ нөҥүө аҕалан көрдөрөбүт, маны тэҥэ төрөөбүт күннээх табаһыттарга бэлэх оҥорон уунабыт. Холобура, бу күннэргэ 3-с №-дээх ыстаада табаһыта Петр Молотович Никитин 61 сааһын, 9-с №-дээх ыстаада табаһыта Василий Васильевич Винокуров 60 сааһын туолла. Кинилэргэ бэлэх туттардыбыт. Түгэнинэн туһанан аҕам саастаах дьонтон суртар, ол эбэтэр сирдэр, үрэхтэр ааттарын туһунан туоһуластым. Элбэх сир уонна үрэх эбээннии ааттаммытын биллим”, — диэн кэпсиир Любовь Семеновна.
Табаны иитэр хаһаайыстыбалар сылга иккитэ харааллааһыны ыыталлар, ол эбэтэр табаларын түмэн ааҕаллар, наардыыллар, итиэннэ эмтиир-сэрэтэр дьаһаллары тэрийэллэр, ирдэнэр быһыылары оҥороллор. Табаны ааҕы сааскы төрүөх кэнниттэн, итиэннэ күһүн ыстаадалар кыстыкка киириилэригэр ыытыллар.
Бу үлэҕэ табаһыттар эрэ буолбакка, ыстаада бары үлэһиттэрэ, хаһаайыстыба исписэлиистэрэ, улуустааҕы бэтэринээринэй сулууспа уонна тыа хаһаайыстыбатын управлениетын исписэлиистэрэ сылдьаллар.
Холобура, бэтэринээрдэр ыстаадаларынан сылдьан, бруцеллез, ииригирии, некробактериоз курдук ыарыылары сэрэтэр быһыылары биэрэллэр, чинчийиилэри оҥороллор, анаалыс ылаллар.
Күһүүр “Булунскай” муниципальнай унитарнай тэрилтэтэ түөрт таба ыстаадалаах, онно билиҥҥитэ 30 кэриҥэ киһи үлэлиир.
Тэрилтэ салайааччыта Руслан Лукин иһитиннэрбитинэн, ахсаан этэҥҥэ ааста, ол гынан баран сүтүк элбэх. “Быйыл күн-дьыл туран биэрэн, табалар этэҥҥэ кыстаатылар, ол гынан баран адьырҕа кыыл буулаан, таба көрдөрүүтэ мөлтөх, сүтүк элбэх”, — диэн этэр салайааччы.
Онтон Хара-Уулаах уонна Бороҕон нэһилиэктэрин хаһаайыстыбалара хараалга бу күннэргэ тахсыахтара. Сааскы ахсаан кэнниттэн табаһыттар түбүктээх үлэҕэ турунуохтара.
Я. Иванова