Бүгүн, көтөр аалынан Булуҥ улууһун делегацията 18 табаны илдьэ Дьокуускай куоракка айаннаатылар, бу туһунан тыа хаһаайыстыбатын управлениета иһитиннэрдэ.
Табаһыттар Дьокуускай куоракка буолаары турар IV Табаһыттар сийиэстэригэр кыттыыны ылыахтара. Бу сийиэскэ барыта өрөспүүбүлүкэ 20 улууһуттар 250 делегат мустуохтаах, маны таһынан бу тэрээһиҥҥэ Кытай, Монголия сирдэриттэн кыттыахтара.
Булуҥ улууһуттан үс таба хаһаайыстыбатыттан, ол эбэтэр “Борогонскай”, “Приморскай”, “Булунскай” табаны иитэр тэрилтэлэриттэн барыта алта табаһыт, түөрт ыстаада биригэдиирэ, түөрт чуумүлэһит, ону тэҥэ зоотехник уонна управление исписэлиистэрэ кыттыыны ылаллар.
Сийиэс чэрчитинэн пленарнай мунньах, “Северное домашнее оленеводство во второй четверти ХХI века» төгүрүк остуол, сэминээрдэр ыытыллыахтара. Табаһыттарга В.И. Кладкин аатынан Саха Өрөспүүбүлүкэтин судаарыстыбаннай бириэмийэтин туттарыы күүтүллэр. Маны таһынан, табаһыттар Арктикатааҕы агротехнологическай университекка квалификацияны үрдэтэр кылгас болдьохтоох куурус ааһыахтара. Ону тэҥэ, кинилэргэ анаан уопсастыбаннай доруобуйа уонна медицинскэй профилактика киинигэр доруобуйаларын туругун көрүү тэриллиэ, Дьокуускай куорат кэрэ миэстэлэринэн экскурсия ыытыллыахтара. «Кочевая семья” өрөспүүбүлүкэтээҕи куонкурус буолуоҕа. Бу куонкуруска Бороҕон нэһилиэгиттэн Иван уонна Мирена Дьяковскайдар дьиэ кэргэттэрэ кыттыыны ылар.
Табаһыттары араас күрэх күүтэр, ол эбэтэр маамыктары быраҕыы, табанан сүүрдүү, эстафета уонна да атын болҕомтону тардар күрэхтэһиилэр күүтэллэр. Бу тэрээһиннэр кулун тутар 20 күнүгэр Сайсары күөлүгэр ыытыллыахтара.
Онтон кулун тутар 21 күнүгэр А.Е. Кулаковскай аатынан норуоттар доҕордоһууларын дьиэтигэр улахан кэнсиэр былааннанар. Манна күрэхтэһиилэр, куонкурустар түмүктэринэн наҕараадалары туттарыахтара.
Тэрээһиннэри Саха Өрөспүүбүлүкэтин тыа хаһаайыстабатын уонна ас-үөл бэлиитикэтин министиэристибэтэ, Саха Өрөспүүбүлүкэтин Хоту дойду норуоттарын дьыалаларын министиэристибэтэ тэрийэллэр.
Я. Иванова