Бу күннэргэ элбэх хайысхалаах мобильнай биригээдэ Булуҥ улууһугар кэлэн номнуо үлэлии сылдьар. Ол курдук, быраастар балаҕан ыйын 19 күнүттэн саҕалаан Бороҕон, Хара-Уулаах, Таймылыыр олохтоохторун доруобуйаларын көрдүлэр-иһиттилэр, сүбэ-ама биэрдилэр. Салгыы Күһүүр, Быыкап олохтоохторун туруктарын чинчийиэхтэрэ. Быраастар чинчийиигэ наадалаах бары тэрилинэн толору хааччыллыылаахтар.
Санатар буоллахха, мобильнай биригээдэ быйыл Булуҥ улууһугар иккис сырыытын кэлэн үлэлии сылдьар. Терапевт, кардиолог, ортопед, гинеколог, невролог, харах бырааһа уонна да атын быраастар олохтоохтору көрбүттэрэ, суһал көмө оҥорбуттара. Ону таһынан гормоҥҥа, онкомаркерга, саахарга уонна да атын анализка хаан туталлар.
Таймылыыр олохтооҕо Варвара Винокурова быйыл куораттан эмчиттэр бөлөхтөрө кэлбитигэр ис туругун, доруобуйатын көрдөрбүт. “Быраастар наһаа болҕомтолоохтук көрөллөр, эмтэрин анаан, араас консультация биэрэллэр. Онон ыраах сытар нэһилиэктэргэ болҕомто улаатта”, — диэн үөрүүтүн үллэстэр.
Бэйэ. кэр.