Тиксии олохтоохторо Төрөөбүт тыл уонна сурук-бичик күнүн чэрчитинэн сылын аайы ыытыллар “Сахалыы дьыктаан” ааксыйаҕа кыттан өрөспүүбүлүкүлэтээҕи дьыктаан суруйуутугар кытыннылар. Суорун Омоллоон “Чүөчээски” сэһэниттэн быһа тардан “Толугур алаас” диэн тиэкиһи улуустааҕы киин бибилэтиэкэ үлэһитэ Павлина Скрыбыкина сахалыы тылынан дорҕоонноохтук ааҕан суруйтарда. “Дьыктаан сыала-соруга саха тылын таба суруйуу быраабылаларын олоҕурдууну өйөөһүн” диэн бэлиэтиир ыытааччы.
Дьыктааҥҥа быһата 20-чэ киһи кыттыыны ылан билиилэрин хаҥаттылар. Бу тэрээһиҥҥэ сөбүлээн сылын аайы кыттар дьон элбэх. Холобура, Светлана бибилэтиэкэҕэ ыытыллар тэрээһиннэргэ куруутун сөбүлээн кыттар. «Мин бибилэтиэкэ үлэһиттэрэ ыытар тэрээһиннэригэр сөбүлээн кыттабын. Ол курдук, сылын ахсын географическай, тотальнай, историческай, этнографическай, сахалыы дьыктааннарга кыттан сахалыы, эбээннии, эбэҥкилии тылынан дьыктаан суруйан холонобун, тест ааһан бэйэм билиибин хаҥатабын», — диэн сэһэргиир Светлана Николаева.
Онтон Бороҕон нэһилиэгин олохтоохторо “Таптыыр сахам тыла” диэн ааксыйаҕа кыттан эмиэ дьыктаан суруйдулар. Дьыктааны буоларын курдук, дорҕоонноохтук ааҕан олохтоох бибилэтиэкэ үлэһитэ Светлана Горохова суруйтарда. Бу кэннэ мустубут дьон сахалыы тыынынан хоһоон ааҕан иһитиннэрдилэр. Тэрээһини Сэмэн Тумат тылыгар, Иван Поисеев мелодиятыгар суруллубут Булуҥ улууһун Өрөгөйүн ырыатын (гимнин) ыллаан түмүктээтилэр.
Маны тэҥэ ааҕар саалаҕа Сэмэн Новгородов кинигэтин быыстапката турда. Мустубут дьон ааптар кинигэтин көрөн сэргээтилэр.
Бу курдук, Төрөөбүт тыл, сурук-бичик күнүн бэлиэтээн: «Таптыыр сахабыт тылынан саҥарыаҕыҥ, саха буолан сандаарыаҕыҥ!”, — дэһэллэр Булуҥ улууһун олохтоохторо.
Түмүккэ, хас биирдии кыттааччы туоһу суругунан бэлиэтэннэ.
Я. Иванова