Олунньу 13 күнүгэр Төрөөбүт тыл уонна сурук-бичик күнүн көрсө Булуҥ улууһугар араас тэрээһиннэр буолан аастылар. Ол курдук Бороҕон орто оскуолатын үөрэнээччилэрэ сылын аайы ыытыллар “Сахалыы дьыктаан” ааксыйаҕа кыттан “Таптыыр сахам тыла”өрөспүүбүлүкүлэтээҕи дьыктаан суруйуутугар кытыннылар. Тэрээһини Варвара Колесова салайааччылаах “Дьэргэлгэн” үҥкүү ансаамбыла арыйда.
Ол кэннэ Раиса Афанасьевна Стручкова алгыс тылынан сиэр-туом толордо. Кини Саха тыла кэхтибэтин, сайда турдун диэн баҕа санаатын эттэ.
Олохтоох бибилэтиэкэ үлэһитэ Светлана Горохова Семен Новгородов алпаабытын уонна олоҕун туһунан оҕолору билиһиннэрдэ уонна мустубут оҕолорго дьыктаан суруйтарда.
Дьыктаан уон сорудахтаах: тоҕус сорудах тест быһыытынан бэриллибит ыйытыылар уонна биир бэриллибит тиэмэҕэ өйтөн суруйуу.
Салгыы саха тылын уонна литературатын учуутала Сандаара Тобонова “Өбүгэ үгэһэ” диэн биэс түһүмэхтээх оонньуу ыытта. Онно кыайыылааҕынан 9 уонна 11 кылаас оҕолоро таҕыстылар.
Хас биирдии кыттааччы туоһу суругунан бэлиэтэннэ.
Бу курдук сэргэхтик төрөөбүт тыл, сурук-бичик күнүн бэлиэтээтибит. Таптыыр сахабыт тылынан саҥарыаҕыҥ, саха буолан сандаарыаҕыҥ!
Сандаара Тобонова,
Бороҕон орто оскуолатын
Саха тылын уонна литературатын учуутала
