Ол курдук, бу күннэргэ эдэр худуоһунньук Мария Аммосова уруһуйдуон баҕалаах дьону муста. Саҥа саҕалааччылар түмсэн айылҕа кэрэ көстүүтүн, хартыыналартан үтүктэн холоннулар, ону тэҥэ саҥа дьыллааҕы тиэмэҕэ харыйаҕа ыйаллар шариктарга ойуу түһэрдилэр, саһа сылдьыбыт талааннарын уһугуннаран искусство живопись курдук уустук көрүҥүн баһылаатылар.
Сыта сымара суох акрил кыраасканан уруһуйу оҥоруу сонун дьарыгыттан кыттааччылар дуоһуйууну ыллылар, олус астыннылар, сирэйдиин-харахтыын сырдаабыкка дылы буоллулар.
Мария хас биирдии киһини кэрийэ сылдьан уруһуй кистэлэҥин арыйар. Ол курдук, хаһан да уруһуйдаан холоммотох Анастасия Хорошевская түөрт чаас иһигэр биэс саҥа дьыллааҕы тиэмэҕэ харыйа оонньуурун ойуулаан барда. Бастаан утаа, сатаныа суоҕа диэн куттаммыт бэйэтэ, кэлин олус да сөбүлээн, үлэтиттэн бэйэтэ да астынна.
Харандаас, киистэ диэни илиитигэр туппатах Лариса Осипова айылҕа кэрэ көстүүтүн хартыынаҕа түһэрэн бэйэтэ биир сатабылын арыйда.
Ольга Брин маннык маастар-кылааска номнуо иккис сырыыта. Бастаан хартыына уруһуйдаабыт эбит буоллаҕына, бу сырыыга харыйа оонньуурун уруһуйдаан киэргэттэ.
Онтон Туйара Никифорова бу икки киэһэ «икки куобаҕы өлөрдө» диэххэ сөп. Кини айылҕа биир кэрэ көстүүтүн хартыынаҕа түһэрдэ уонна харыйаҕа ыйанар шардарын уруһуйдаан киэргэттэ. «Уруһуйдуур үчүгэй эбит, олус сөбүлээтим. Бэйэм биирдэ эмэ дьиэбэр харандааһынан уруйдаан холонобун, ол гынан акварель, гуашь, акрил кыраасканан уруһуйдаан холоно иликпин. Бу курдук маастар-кылаастары оҥорор буолбуттара олус үчүгэй, киһи дууһалыын сынньанар», — диир Туйара Васильевна.
Эдэр худуоһунньук Мария Аммосова Верхоянскайтан төрүттээх. Дьокуускай куорат Арктикатааҕы институт живописец-худьуоһунньук салаатын бүтэрэн, биэс сыл Мирнэй куоракка Искусство оҕо оскуолатыгар үлэтин саҕалаабыт. Мария билигин оҕотугар олорор, ол гынан, иллэҥ кэмигэр уруһуйдуон баҕалаах дьоҥҥо маастар-кылаас ыытан дьоҕурдарын уһугуннарар.
«Тиксиигэ олунньу ыйга кэргэмминээн кэлбитим. Билигин оҕобор олоробун, ол гынан, иллэҥ кэммэр уруһуйдуон баҕалаах дьону түмэн үөрэтэбин. Саҥа саҕалыыр дьон акрил кыраасканан туһаналлар, бу кырааска сыта суох. Үөрэнээччилэрим араас саастаахтар, оҕолор да бааллар, аҕам саастаах дьон да кэлэн холоноллор. Уруһуйдарын бэйэлэрэ талаллар. Хаһан да киистэни илиилэригэр тутан көрбөтөх дьон уруһуйдаан, астынан баралларыттан бэйэм да үөрэбин», — диир Мария.
Бу курдук хаһан даҕаны уруһуйдаан холоммотох дьон мустан уруһуй тиэхиникэтин баһылаан, астынан, дууһалыын сынньанан, сатаабатахтарын сатаан, сынньалаҥнарын туһалаахтык атаардылар.
Я. Иванова