Олоҥхо декадатын чэрчитинэн «Кэнчээри» оҕо уһуйаанын иитиллээччилэрэ «Олоҥхо биһигэр» ыалдьыттаатылар.
Ол курдук, кырачааттары бибилэтиэкэ үлэһитэ Светлана Горохова Олоҥхо геройдарын кытары, ол эбэтэр Ньургун Боотур уонна Туйаарыма Куолуун билиһиннэрдэ. Оҕолор Үөһээ, Орто уонна Аллараа дойду олохтоохторун туһунан элбэҕи биллилэр. Маны тэҥэ Бай-Байанай, Күөх Бөлөх, Уот Уххан, Дьыл Оҕуһа, Аал Луук мас курдук мифическай персонажтар тустарынан интэриэһиргээн олус астыннылар.
Бороҕон нэһилиэгэр маннык тэрээһин үтүө үгэскэ кубулуйбута. Ол курдук, алтынньы ыйтан саҕалаан оскуола оҕолоругар «Олонхо — биһиги биһикпит» тэрээһин, «Олоҥхо алыптаах эйгэтэ» ааҕыы күрэҕэ ыытылыннылар.
Саха сиригэр Олоҥхо күнэ сэтинньи 25 күнүгэр бэлиэтэнэр. Олоҥхо — Саха норуотун былыргы эпоһын ускуустубата. Бу күн 2005 сыл сэтинньи 25 күнүгэр ЮНЕСКО саха эпоһын шедевринэн билиммитэ.
Я. Иванова