Бу күннэргэ Намыыга Саха сиригэр уол оҕо күнүн чэрчитинэн тэрилтэлэр икки ардыгар “Байанай күрэгэ” буолан ааста.
Тэрээһин эдэр чемпион-табаһыт Вячеслав Колесовы чиэстээһинэн саҕаланна. Санатар буоллахха, Вячеслав Эбээн-Бытантай улууһугар ыытыллыбыт таба сөлүөтүгэр сыаргалаах табанан 5 км, 10 км сүүрдүүгэ, комбинированнай эстафетаҕа кыайыылаах тахсан үс буран хаһаайына буолан дьонун-сэргэтин үөртэ.
Эдэр чөмпүйүөн дьиэ кэргэнэ Булуҥ оройуонун Намыы сэлиэнньэтин олохтоохторо. Вячеслав дьонун көрсө дойдутугар кэлэ сылдьарынан туһанан, биир дойдулаахтара бары да үөрэн туран кинини эҕэрдэлээн көрүстүлэр, тэрилтэ салайааччылара алгыс тылы этэн туран сэмэй бэлэхтэрин туттардылар. Уол эбээтэ Мотрена Семеновна Старостина, күрэх кыттыылаахтарын, биир дойдулаахтарын алгыстаах алаадьынан күндүлээтэ.
Табаһыт-чөмпүйүөн дьоно бары да удьуор табаһыттар. Кини кыра эрдэҕиттэн ыстаадаҕа сылдьан дьонуттан элбэххэ үөрэнэн, уопутуран аҕатын, Альберт Владимирович аҕа ууһун общинатыгар ситиһиилээхтик бостуугунан үлэлиир. Слава эргиччи талааннах дьоҕурдаах эдэр киһи, кэргэннэх, оҕолоох.
Бу бырааһынньык уол оҕону иити улахан суолталааҕын көрдөрөр, дьиэ кэргэн төрүт үгэһин бэлиэтиир, сайыннарар. Ол ону биһиги табаһыт уолбут көлүөнэтиттэн күүс ылан холобуругар көрөбүт, киэн туттабыт.
Байанай күрэх “Биир киһи барыбыт туһугар, бары биир киһи туһугар” диэн этиинэн салайтаран, олус тэрээһиннээхтик, интэриэһинэйдик, үрдүк таһымҥа ааста. Күрэххэ уопсайа түөрт тэрилтэ хамаандата кыттыыны ылла, 20 эр бэрдэ күөн көрүстэ. Ол курдук, Дьиэ-уот коммунальнай хаһаайыстыба (салайааччы Н.В. Бурцев), Уот ситимин тэрилтэтэ (салайааччы А.Н. Бурцев), Бороҕон орто оскуолата (дириэктэр А.Р. Софронеева), “Кэнчээри” оҕо уһуйаана (салайааччы Ф.Х. Рожина) хамаандала күөн көрүстүлэр.
Күрэх уот оттон чэй оргутуу, буранынан сүүрдүү, буран сыарҕатын соһон сүүрүү, хаарынан сыыллыы, 100 миэтирэҕэ булчут хайыһарын кэтэн сүүрүү, куул кэтэн ыстаныы, аптамаат саа хомуйуу, тоҥуу хаарынан сүүрүү, кыыс эккирэтии, тоҥ балык кыһыы, хомуур хапсаҕайа, маамыкта быраҕыыта, ханаат тардыһыыта уонна да атын түһүмэхтэртэн турда.
Кыттааччылар бары да көхтөөхтөрүн уонна бэлэмнээхтэрин көрдөрдүлэр.
Тыҥааһыннаах киирсии түмүгүнэн уонна уопсай түмүк көрдөрүүтүнэн, муҥутуур кыайыылааҕынан Бороҕон орто оскуолатын хамаандата (хапытаан С. Шадрин) ааттанна, иккис миэстэни Уот ситимин хамаандата (хапытаан А. Бурцев) ылла, үһүс миэстэҕэ Дьиэ-уот коммунальнай хаһаайыстыбатын хамаандата (хапытаан В. Бурцев) тигистэ.
Маны таһынан “Кыайыыга дьулуурун иһин” номинация “Омолой” этнокултуурунай киин уонна “Кэнчээри” оҕо уһуйаанын хамаандалара тиксэн, бэлэх ылан үөрүүлэрэ үгүс.
Күрэх түмүгүнэн хас биирдии кыттаачыга барыларыгар сыаналаах бириис туттарылынна.
“Көрөөччүлэр, ыалдьааччылар тэрээһин үрдүк таһымҥа ааста диэн бэлиэтээтилэр. Күрэҕи кылаабынай судьуйа, нэһилиэк биир бастыҥ ыччата Софрон Старостин иилээн-саҕалаан ыытта. Кини көмөлөһөөччүлэринэн спорт бэтэрээнэ, тустууга мастер спорта хандьыдаата Алексей Стручков, чөл олоҕу уһуйааччы, спорт бэтэрээнэ Петр Бурцев, ону тэҥэ Раиса Находкина, Нюргустана Старостина уонна Мирена Дьячковская үлэлээтилэр.
Түгэнинэн туһанан, күрэҕи тэрийсиигэ күүс-көмө буолбут биир дойдулаахтарбар, чуолаан Илья Иванович Старостиҥҥа, Василий Николаевич Бурцевка, Сергей Сергеевич Шадриҥҥа, Андрей Васильевич Кыняхыровка уонна Павел Романович Бурцевка барҕа махталбын тиэрдэбин. Эт-хаан өттүнэн сайда, өбүгэ үгэһин оонньууларын тарҕата туруҥ уонна эһиги инники көлүөнэҕэ холобур буоларгытын умнумаҥ” – диэн аглыс тылын тиэрдэр “Омолой” этнокультуурнай киин дириэктэрэ Ирина Бурцева.
Тэрээһин Бороҕон дьаһалтатын, “Омолой” этнокультуурнай киин уонна “Синкэн” тэрилтэ көҕүлээһининэн ыытылынна. Күрэх сүрүн сыалынан уопсастыбаҕа уол оҕо уонна сыаннаһын уонна аҕа оруолун үрдэтии, спорду, чөл олоҕу пропагандалааһын буолар.
Тэрээһин Дьиэ кэргэн уонна Оҕо саас сылыгар олоҕуран ыытылынна.
Я. Иванова