Бүгүн, кулун тутар 19 күнүгэр, Саха сиригэр Арктика күнэ бэлиэтэнэр. Арктика улуустарын сайыннарар уонна өйүүр инниттэн Ил Дархан Егор Борисов ыйааҕынан 2014 сыллаахха Арктика күнэ олохтоммута, онтон ыла сыллата кулун тутар 19 күнүгэр Саха сиригэр Арктика күнэ бэлиэтэнэр.
Республика үрдүнэн Арктика сиригэр-уотугар киирэр 13 улуус баар, олортон биирдэстэрэ Булуҥ улууһа буолар. Улуус 223,6 тыһ. кв. км иэннээх, Усуйаана, Үөһээ Дьааҥы, Эбээн Бытантай, Эдьигээн, Өлөөн уонна Анаабыр улуустарын кытта кыраныыссалаһа сытар.
Сэттэ муниципальнай тэриллиилээх: Быыкап, Таймылыыр, Күһүүр, Сииктээх, Хара-Уулаах уонна Бороҕон нэһилиэктэрэ, оройуонун киинэ – Тиксии. Тыа хаһаайыстыбата сүрүн салаатынан табаны, ынаҕы, сылгыны иитии буолар, ону таһынан оройуон минньигэс, сыалаах балыгынан биллэр.
Кэлиҥҥи сылларга Арктиканы сайыннарыы күүскэ барар, ол курдук, аэропортары саҥардаллар, аччыгый авиацияны сайыннараллар, нэһилиэнньэлээх пууннары интэрниэтинэн хааччыйаллар, социальнай эбийиэктэри туталлар, саҥа кииннэри арыйаллар, оскуолалар өрөмүөннэнэллэр, Хотугу муоранан суудуна сырыытын сөргүтэр үлэ барар, ол курдук, Тиксии пуордун кыраныыссата кэҥэтиллиэҕэ уонна Тиксииттэн 112 км тэйиччи турар Найба сэлиэнньэтигэр муора терминала тутуллуоҕа.
Маны таһынан, Ил Дархаммыт Айсен Николаев көҕүлээһининэн хоту оройуон олохтоохторугар медицина өҥөтүн оҥорууга “мобильнай быраастар” биригээдэлэрэ күүскэ үлэлэһэр.
Я. Иванова