Олунньу 21 күнүгэр Намыыга отчуоттуур бырабыыталыстыба бөлөҕө үлэлээтэ. Нэһилиэнньэни кытта көрсүһүү «Омолой» култуура киинигэр ааста. Киин дириэктэрэ Ирина Бурцева отчуоту биһирээбит, сэҥээрэн истибит:
— Бырабыыталыстыба үлэтин үчүгэйдик сыаналыыбын. Маннык отчуоттарга былаас дьону кытта аһаҕастык кэпсэтэр, дьону кытта үлэлэһэр, кыһалҕаларын истэр, төһө кыалларынан сүбэ-ама биэрэр. Дьон отчуокка көхтөөхтүк кытынна, араас ыйытыы киирдэ. Олортон сүрүн боппуруоһунан буолар хочуолунай уонна оскуола-саад тутуута. Ыйытыыларга хоруй туттубут, кыһалҕабытын быһаарыахтара диэн эрэнэбит. Элбэх үлэ барар дии саныыбын. Ол курдук, бу күннэргэ быраастар мобильнай биригээдэлэрэ Булуҥҥа үлэлээн барда. Бу олус хайҕабыллаах дьыала, манна дьон махтала элбэх. Быраастар Уһук Хоту сылдьан дьон доруобуйатын көрөллөр-истэллэр, сүбэ биэрэллэр. Ону тэҥэ Дьиэ кэргэн уонна Оҕо саас сылларын чэрчитинэн саҥа дьаһаллар тахсыбыттарын сэргии истибиппит. Кэнники кэмҥэ дьиэ кэргэни өйүүр араас элбэх дьаһаллар тахсаллар. Холобура, эдэр дьон 35 саастарыгар диэри холбостохторуна көмө киирбит, 7-13 саастаах үөрэнээччилэр «Карта юного жителя Якутии» каартаны ылыахтара, элбэх оҕолоох ыалларга эмиэ элбэх көмө баар. Бу барыта олох тупса турарын туоһулуур. Президеммит, Ил Дархаммыт, бырабыыталыстыбабыт үлэлэрин түмүгүнэн буолар.
Александра Стручкова