Быыбар иккис күнэ Хара-Уулаахха тэтимнээхтик салҕанар

Хара-Уулаах орто оскуолатыгар 72 №-дээх быыбардыыр учаастак иккис күнүн аана 8 чааска тэлэччи арылынна. Хамыыһыйа чилиэннэрэ эрдэ кэлэн, дьон учаастакка кэлэр кэмигэр толору бэлэм көрүстүлэр. 

Найба нэһилиэгэр 72 нүөмэрдээх быыбардыыр учаастакка хамыыһыйа бэрэссэдээтэлин солбуйааччы Надежда Никитина, сэкирэтээр Ольга Сивцева уонна хамыыһыйа чилиэннэрэ Наталья Никитина, Лариса Захарова кулун тутар 15-17 күннэригэр быыбары тэрийэллэр. Ону тэҥэ, учаастакка үлэлииллэр: кэтээн көрөөччүлэр — Раиса Бурцева, Мария Иванова; Булуҥнааҕы ИДьУо сотруднига Борис Акимов.

Бэрэсидьиэн быыбарыгар маҥнайгы куоластааччынан бу учаастакка буолбут Раиса Христофоровна Стручкова.

Бастакытын быыбарга кыттар 18 саастаах 11 кылаас үөрэнээччитэ Даша Черкашина эмиэ бу күн кэлэн бэйэтин кандидатыгар  куоластаабыт.

Эдэр оҕоҕо хамыыһыйа чилиэннэрэ эҕэрдэлээн туран өйдөбүнньүк бэлэх туттарбыттар.

Ону тэҥэ аҕам саастаахтартан биирдэстэрэ Захарова Елена Гаврильевна быыбардыыр учаастакка кэлэн гражданскай иэһин толорбут.

«Куоластааһын салҕанар, бэрээдэги кэһии бэлиэтэммэт», — диэн чопчулуур Ольга Константиновна

Александра Стручкова

Читайте дальше