Арктикаҕа пилотнай бырайыак быһыытынан муус устар 4 күнүттэн саҕалаан Булуҥ улууһугар Дьокуускай куораттан мобильнай биригээдэ кэлэн үлэлии сылдьар. Муус устар 4-6 күннэригэр быраастар Күһүүр сэлиэнньэтин хабан үлэлээтилэр, бүгүн иккис күннэрин Сииктээх олохтоохторун көрөр-истэр.
Ыраах сытар кыра нэһилиэктэр, уһук хоту дойду олохтоохторо быраастар кэлэллэрин кэтэһэллэр уонна сөбүлээн көрдөрөллөр. Ол курдук, Күһүүргэ 160-тан тахса киһи көрдөрүннэ, ол иһигэр сэттэтэ оҕо. 70-тан тахса ыарыһах ультразвуковой чинчийиини ааста, 90-ча киһи терапевт быраас консультациятын ылла, бу туһунан биһиги хаһыаппытыгар Күһүүрдээҕи амбулатория медицинскэй сиэстирэтэ Сахая Лазарева иһитиннэрдэ.
Онтон Сииктээххэ исписэлиистэр икки күн устата 60-ча киһини хабан көрдүлэр. Сорох ыарыһахха өрөспүүбүлүкэ киинигэр баран салгыы көрдөрөллөрүгэр сүбэлээтилэр.
Мобильнай биригээдэҕэ УЗИ-бырааһа, терапевт, эндокринолог, кардиолог, акушер-гинеколог (онкогинеколог), офтальмолог, ортопед, онколог, пульмонолог быраастар уонна икки медицинскэй сиэстирэлэр сылдьан көрөллөр. Бастатан туран кинилэр онкомаркер, генетика уонна биохимия анаалыһын ылаллар, сүрэх, быар, бүөр уонна хорук тымыр ультразвуковой чинийиитин оҥороллор.
Мобильнай биригээдэ быраастара быйыл Булуҥ улууһугар бастакы сырыылара. Биригээдэни Иван Егорович Захаров салайан илдьэ сылдьар. Салгыы, хааллаан туругунан, Хара-Уулаах нэһилиэгэр тиийиэхтэрэ.
Я. Иванова