Балаҕан ыйын 6 күнүттэн саҕалаан Булуҥ улууһугар Дьокуускай куораттан быраастар мобильнай биригээдэтэ үлэлиир.
Балаҕан ыйын 10-17 күннэригэр быраастар Хара-Уулаах, Бороҕон нэһилиэкэтэрин хабан үлэлээтилэр, салгыы Таймылыыр олохтоохторун туруктарын көрдүлэр, бу күннэргэ оройуон киинигэр үлэлиэхтэрэ, онтон салгыы, күн-дьыл турдаҕына, Күһүүр сэлиэнньэтигэр айанныахтара.
Мобильнай биригээдэҕэ гинеколог, УЗИ бырааһа, терапевт, кардиолог, невролог, хирург-онколог, отоларинголог, окулист, уролог, эндокринолог быраастар үлэлииллэр, икки медицинскэй сиэстирэлэр ИХА, гепатит, СПИД, ВИЧ, туберкулез, гормон, онкомаркер, биохимия анаалиһын ылаллар.
Бүгүҥҥү күн туругунан, өрөспүүбүлүкүтээҕи медицинэ биригээдэ киинин быраастарыгар 300-тэн тахса олохтоох киһи көрдөрүннэ, доруобуйатын тупсарда.
Санатар буоллахха, бу бырайыак Ил Дархан Айсен Николаев көҕүлээһининэн 2023 олунньу ыйыттан олоххо киирэн күүскэ үлэлиир уонна хоту улуустары бүттүүнүн хабан үлэлиир.
Я. Иванова