Найба сэлиэнньэтин эдэр ыччата анал байыаннай дьайыыга сылдьар биир дойдулаахтарын дьиэ кэргэттэригэр муус ылан дьиэлэригэр тиэртилэр, бу туһунан олохтоох дьаһалта баһылыгын солбуйааччы Сардана Никитина иһитиннэрдэ.
Ол курдук, нэһилиэк дьаһалтатын баһылыга Иннокентий Иванов салайааччылаах эдэр ыччат, ол эбэтэр, Хара-Уулаах орто оскуолатын учуутала Владимир Неустроев, этнокултуурнай киин үлэһитэ Дмитрий Данилов, уот ситимин маастара Иннокентий Попов, нэһилиэк биир эдэр ыччата Чимит Чиряев, дьиэ-уот коммунальнай хаһаайыстыбатын үлэһитэ, нэһилиэк Сэбиэтин дьокутаата Федот Константинович Аммосов анал байыаннай дьайыыга сылдьар уонна онно олохторун толук уурбут буойуттар дьиэ кэргэттэригэр, ону тэҥэ соҕотох ийэлэргэ кыһыннары иһэр муустарын таһааран үөртүлэр. «Кэлэр кэскилбит, эдэр ыччаппыт, олохтоох дьаһалта, этнокултуурнай киин ыытар тэрээһиннэригэр утары илиитин уунара хайҕаныан эрэ сөп уонна аҕам саастаах дьоммутугар, соҕотох ийэлэргэ күүс-көмө буоларыгар олус диэн махтанабыт. Инникитин бу үлэ салҕана туруо диэн бүк эрэллээхпит. Түгэнинэн туһанан дьокутааппытыгар — Федот Константиновичка махталбытын тиэрдэбит. Кини бэйэтин техникэтинэн дьон көрдөһүүтүн быһа гыммакка тута көмөлөһөрө эдэр ычакка холобур буолар” — диэн үөрүүтүн үллэһиннэ Сардана Алексеевна.
Соб. корр «Маяк Арктики»