Саҥа дьыл бырааһынньыгар бэлэмэнии тыыныгар хаптаран, бу күннэргэ улуустааҕы кииннэмит бибилэтиэкэ ааҕар саалатыгар оҕуруо тиһиитигэр маастар-кылаас буолан ааста.
Киһи киһиттэн үөрэнэр диэн мээнэҕэ эппэттэр, бу өрөбүл күннэргэ уран тарбахтаах маастар Виктория Самойлова баҕалаах кэрэ аҥардарга оҕуруоттан брошь оҥоруутугар маастар-кылаас ыытан бэйэтин сатабылын үллэһиннэ. Манна кэрэни кэрэхсиир ыал ийэлэрэ, эбээлэрэ кэлэн үс араас брошь оҥоһуктарын оҥорон астынан, дуоһуйан тарҕастылар.
Саҥа саҕалааччылары түмэн Виктория Ивановна бисертэн түөскэ иилинэр брошь оҥорор тиэхиникэтин үөрэттэ. Бисеринэн ойуулуу үөрэниэн баҕалаах дьон тоҕуоруһа мустан бары да саһа сылдьыбыт талааннарын уһугуннаран оҕуруо тиһиитин биир уустук көрүҥүн баһылаатылар.
Хаһан да оҕуруо диэни илиилэригэр туппатах ыал ийэлэрэ, эбээлэрэ араас өҥнөөх бисиэри фетраҕа ойуулаан түһэрэн, тигэн, түөскэ иилинэр саҥа дьыллааҕы тематикаҕа гномик, харыйа уонна снеговик оҥорон таһаардылар.
Виктория Ивановна хас биирдии киһини кэрийэ сылдьан иис биир кистэлэҥин арыйар. Ол курдук, хаһан да бисеринэн иистэниигэ холоммотох Светлана Каурцева алта чаас иһигэр саҥа дьыллааҕы тиэмэҕэ снеговик оҥоһугу оҥорон барда. Светлана бэйэтэ да иистэнэ үөрүйэх, “иҥнэни кытта доҕордоһор” буолан түргэн туттуулаах-хаптыылаах.
Иҥнэ, сап, оҕуруо диэни илиитигэр туппатах Анастасия оҕуруоттан кэрэ көстүүлээх харыйа оҥорон бэйэтэ биир сатабылын арыйда. Бастаан утаа сатаныа суоҕа диэн куттаммыт бэйэтэ, кэлин олус да сөбүлээн, үлэтиттэн бэйэтэ да астынна.
Онтон Ольга Барабанская маннык маастар-кылааска номнуо үһүс сырыыта. Ольга үс өрөбүл күн сылдьан кырачаан кыргыттарыгар бэлэх уунаары үс араас брошь оҥордо.
Виктория Ивановна маннык оҥоһугунан дьарыктаммыта номнуо алтыс сыла. Кини брошь оҥорутунан эрэ муҥурдаммат, маастар кырдьык да “барыга бары маастар” – баатаны хатан үтүлүккэ, бэргэһэҕэ тиийэ оҥорор, бырааһынньык күннэригэр бэйэтэ бирээнньик буһаран, киэргэтэн атыылыыр, маны таһынан фотошоп программатын баһылаан хаартыска, араас сертификаттары, дипломнары оҥорон бэчээттиир. Бу дьарыга барыта бэйэ дьарыктаах буолуу (самозанятай) кииҥҥэ регистрацияны ааһан “Студия Виктории” диэн ааттаах.
“Маастар кылаас туһунан урбаанньыттар форумнарын саҕана Наталья Борисова этии киллэрбитэ. Бастаан утаа маастар-кылаас ыытарбар наһаа диэн долгуйбутум. Бастакы тэрээһиним сэтинньи ыйга буолбута, онно уонча киһи кэлэн күһүҥҥү тиэмэҕэ сэбирдэх оҥоһугун оҥорон барбыттара. Бастакы үөрэнээччилэрим оҥоһуктара сатанан үөрүүлэрэ үксээн бэйэм да астыммытым. Онтон ыла бу төрдүс маастар-кылааспын ыыттым. Дьон олус астынан, үөрэн, махталларын тиэрдэллэр. Онтон бэйэм алта сыллааҕыта Анжела Габышева-Токареваҕа үөрэммитим, онтон ылата кыралаан сакаас ылан араас брошь оҥорон атыылыыбын. Ол быыһыгар эмиэ сакаас ылан бирээнньик буһарабын, валяйдаан да ылабын» — диэн кэпсиир Виктория Ивановна.
“Маннык маастар кылаастар буолаллара наһаа үчүгэй, киһи элбэххэ үөрэнэр, иистэнэр дьоҕуруҥ сайдар. Мин холобура бисер, оҕуруо диэни илиибэр туппатаҕым, ымсыырар этим да, сатаныа суоҕа диэн куттанар этим. Онтон бу күһүн куйаар ситимигэр биллэриини ааҕан суруйтаран брошь оҥорор техникатыгар үөрэнэн, бэйэм эмиэ туспа оҥорон холоннум. Бастаан утаа ыарырҕаппытым, онтон киһи барытыгар үөрэнэр дииллэр, син сатанан, табыллан брошька майгынныыр буолан киһи астынар. Дьон сатаабата диэн суох, күүстээх санаа, баҕа эрэ наада. Маннык тэрээһиҥҥэ сылдьан дьону кытта алтыһан сынньалаҥым туһалаахтык ааһарыттан астынабын, онтон Виктория Ивановнаҕа, быыс булан дьоҥҥо бэйэтин сатабылын үллэстэригэр, барҕа махталбын тиэрдэбин” – диэн санаатын үллэһиннэ тэрээһин кыттааччыта Наталья.
Я. Иванова