Намыы олохтоохторо олунньу 5 күнүгэр төрүт таҥастарын кэтэн, киэргэнэн-симэнэн сэлэлии хаамтылар.
Эдэрдиин, кырдьаҕастыын, оҕолордуун уруулардыын араас дьэрэкээн өҥнөөх национальнай таҥастарын кэтэн, маанытык таҥнан кэлбиттэрэ көрүөххэ астык.
«Омолой» култуура киинин дириэктэрэ Ирина Бурцева кэпсииринэн, сэлэлии хаамыыга кыттыыны ылбыттар нэһилиэк уран тарбахтаах иистэнньэҥнэрэ Е.С. Бурцева, М.С. Старостина, М.С. Корякина.
«Эбээлэрэ, ийэлэрэ тикпит таҥастарын кэтэн уһуйаан иитиллээччилэрэ, иитээччилэрэ, оскуола оҕолоро көхтөөхтүк кытыннылар. Биһиги нэһилиэкпитигэр иистэнэр уран тарбахтаахтар элбэхтэр, таланнаах дьоммумунан киэн туттабыт. Уус-уран дьарыктар норуот дьиҥ баайынан уонна кини айымньылаах үлэлэрин биир көрүҥнэринэн буолар. Маны өйөөн Ил Дархан кэнники сылларга анал стипендия олохтоото, концепция ылылынна. Тугэнинэн туһанан, тэрээһиҥҥэ күүс-көмө буолбут оскуола уонна уһуйаан кэлэктииптэригэр улахан махталбытын тиэрдэбит, талба талааннаах иистэнньэҥ дьоммутугар айымньылаах түмүктээх үлэни баҕарабыт», — диэн кэпсээтэ Ирина Алексеевна.
Санатар эбит буоллахха, Норуот маастарын күнэ 2012 сылтан саҕалаан бэлиэтэнэр.
Александра Стручкова