Балаҕан ыйын 21 күнүгэр эти-сиини чэбдигирдэр, чөл олоҕу көҕүлүүр сыаллаах бүтүн Россиятааҕы «Кросс наций» сүүрүү күнэ ыытылынна. Намыы сэлиэнньэтин олохтооҕо сылын аайы ыытыллар тэрээһинтэн хаалсыбат. Ол курдук, Кросска алын кылаас үөрэнээччилэриттэн саҕалаан, кырдьаҕаска тиийэ, уопсайа 61 киһи кыттыыны ылла. Кросс саамай кырдьаҕас кыттааччыта сэттэ уон хаарыгар үктэммит Мария Дмитриевна Дьячковская буолла, бу туһунан бибилэтиэкэ үлэһитэ Светлана Горохова иһитиннэрдэ.
«Кросс наций» тэҥэ, Арассыыйаҕа дьиэ кэргэн, Саха сиригэр оҕо саас сылыгар анаммыт «Ийэ уонна оҕо» эстафета ыытылынна. Бу тэрээһиҥҥэ алта хамаанда күөн көрүстүлэр, ол курдук, Надежда Семеновна уонна Андрей Стручковтар, Вера Константиновна уонна Намина Заревняевалар, Изабелла Ивановна уонна Тимур Стручковтар, Марина Николаевна уонна Леонид Аммосовтар, Катерина Софроновна Старостина уонна Саша Шадрина, Анна Сергеевна уонна Сандаара Находкиналар.
Тыҥааһыыннаах киирсии түмүгүнэн кыайыылааҕынан Изабелла Ивановна уонна Тимур Стручковтар хамаандата таҕыста, иккис миэстэ — Катерина Софроновна Старостина уонна Саша Шадрина буолла, үһүс миэстэҕэ Анна Сергеевна уонна Сандаара Находкиннар дьиэ кэргэн тиксэн үөрүүлэрэ үксээтэ. Кыттааччылар сэмэй бэлэх, сертификат тутан үөрэн-көтөн, астынан тарҕастылар.
Я. Иванова