СӨ экология, айылҕа баайын туһаныы уонна ойуур хаһаайыстыбатын миниистирин солбуйааччы Николай Додохов салайааччылах бырабыыталыстыба бөлөҕө Намыы нэһилиэгин олохтоохторун иннигэр отчуоттаата.
Бырабыыталыстыба бөлөҕүн кытта көрсүһүүгэ «Омолой» култуура киинигэр дьон толору муһунна.
Мустубут дьон отчуот дакылаатын кэнниттэн интэриэһиргиир боппуруостарын көтөхтүлэр.
Намыыга элбэх ыал оһоҕунан оттуллар дьиэҕэ олорор, киин ситимҥэ холбонуохтарын эргэ котельнай кыамтата тиийбэт, чугаһынан оттук мас суоҕун кэриэтэ буолан бу кыһалҕа өссө сытыырхайар, иннэ гынан, бу да сылга саҥа котельнай тутуутун боппуруоһа сытыытык турда. Ону тэҥэ нэһилиэнньэ оскуола-саад тутуутун туоһуласта.
Ол курдук, нэһилиэк баһылыга Вера Стручкова биллэрбитинэн, «СӨ ОДьКХ» ГУТ эксплуатацияҕа сүрүн инженеры солбуйааччы Владимир Владимирович Бондарь нефтебазата суох хочуолунай тутуута кыаллыбатын эппит, маҥнай 2500 тн обьемнаах нефтебаза ирдэнэрин чуолкайдаабыт. Бу тутууга 1 млрд кэриҥэ наадатын чопчулаабыт, оннук харчы билигин суоҕун эппит. Хочуолунай тутуута тыын боппуруос буоларын өйдөөн, норуот депутата Елена Христофоровна Голомарева бу кыһалҕаны тус хонтуруолугар ылбыт, тустаах министиэристибэлэри кытта үлэлэһиэм диэн эрэннэрбит.
Оскуола-саад тутуутун туһунан ыйытыыга, госэкспертиза аастаҕына Инвестпрограммаҕа киириэ диэн рабочай бөлөх эрэннэрбит.
Ону таһынан Отчуот үлэтин чэрчитинэн бырабыыталыстыба бөлөҕө Дьиэ кэргэн уонна оҕо саас сылларынан эҕэрдэлээн туран, икки эдэр ыалга, Соловьевтарга уонна Дьячковскайдарга, Махтал сурук уонна оҕолорго бэлэх туттарбыт, диэн кэпсиир Вера Михайловна.
Александра Стручкова