Таймылыыр нэһилиэгин култуура дьиэтигэр алтынньы 21 күнүгэр өрөспүүбүлүкэ үрдүнэн ыытыллар Ийэ күнүгэр эҕэрдэ уонна Тамара Николаевна Посельская сырдык кэриэһигэр анаммыт «Ийэ сылаас мичээрэ» кэнсиэр буолан ааста.
Бу истиҥ тэрээһиҥҥэ нэһилиэк олохтоохторо, оскуола оҕолоро көхтөөх кыттыыны ыллылар.
«Ийэлэргэ уонна мин эдьиийбэр Тамара Николаевна сырдык кэриэһигэр анаммыт кэнсиэр өрө көтөҕүүлээхтик ааста диэххэ сөп. Кыттыыны ылбыт дьоммутугар барҕа махтал. Көрөөччүлэр олус астынан, дуоһуйан, сынньанан, дьиэлэригэр тарҕастылар», — диир кулууп үлэһитэ Дария Андросова.
Санатар буоллахха, Тамара Николаевна «Тугутчаан» уһуйааҥҥа өр сылларга иитээччинэн үлэлээбитэ. Кини иитэн таһаарбыт оҕолоро билигин бэйэлэрэ ийэ, аҕа, эбээ, эһээ буолан, төрөөбүт нэһилиэктэригэр эрэ буолбакка, республика иһинэн, таһынан тэнийэн үлэлии сылдьаллар.
Я. Иванова