От ыйын 1 күнүгэр, Саха сирин бэчээтин үлэһиттэрэ төрдүс сылын национальнай бэчээт Күнүн бэлиэтииллэр.
Национальнай бэчээт күнэ Саха сиригэр 2020 сыллаахтан Өрөспүүбүлүкэ Ил Дарханын Айсен Николаев ыйааҕынан бэлиэтэнэр.
Ол төрүөтүнэн 1907 сыл от ыйын 1 күнүгэр сахалыы тылынан тахсыбыт «Саха дойдута» («Якутский край») хаһыат күн сирин көрбүтэ буолар. Хаһыаты уопсастыбаннай, политическэй деятель, сырдатааччы Василий Никифоров-Күлүмнүүр биир санаалаахтарын кытта иилээн-саҕалаан таһаарбыттара.
Бастакы уопсастыбаннай-политическэй уонна литературнай суолталаах таһаарыы национальнай суруналыыстыка сайдарыгар уонна саха литературнай тыла тэнийэригэр олук уурбута.
Булуҥ улууһугар оройуон хаһыатын бастакы нүөмэрэ «BULUN КЫhАТА» диэн ааттанан 1938 сыллаахха ыам ыйын 1 күнүгэр бэчээттэнэн тахсыбыт. Ол сыл ыам ыйын 9 күнүгэр ССКП Обкомун быһаарыытынан «POLEERNEJ SULUS» диэн ааттаммыт уонна 1940 сыллаахха дылы сахалыы тылынан бэчэтэнэн тахсар. 1944 сылтан икки тылынан – нууччалыы уонна сахалыы бэчээттэнэн тахсар буолбут. Бастакы эрэдээктэринэн Илья Гаврильевич Мордовской ананан үлэлээбитэ.
1965 сылтан хаһыат «Маяк Арктики» диэн ааттанан тахсар. Ити кэмтэн элбэх сыл-хонук ааста. Араас сылларга элбэх кылаабынай эрэдээктэр, эппиэттээх сэкэритээр, суруналыыс, отдел эрэдээктэрдэрэ, кэриэктэр уларыйда. Хаһыат балаһата, стилистиката, дизайна уларыйан тахсар буолла. Ону таһынан ааҕааччыларга анаан хаһыат анал саайта үлэлиир, ону сэргэ “Телеграм”, “Вконтакте”, “Одноклассники” курдук социальнай ситимнэргэ анал ханаал, страница¬ арыйан үлэбит кээмэйэ кэҥээн, ис хоһооно дириҥээн биэрдэ. Ол гынан, хаһыат устуоруйа кэрэһитин быһыытынан, суолтата хаһан да сүппэт.
Хаһыат биир киһи үлэтин түмүгэ буолбатах, айар кэлэктиип бүттүүнүн сырата. Бүгүн биһиги дьоҕус кэлэктииппитигэр үлэлии-хамсыы сылдьаллар, ааҕааччыларга күннэрэ сонуну тиэрдэллэр – эдэр, эрчимнээх кылаабынай эрэдээктэр Артем Ослопов, отдел эрэдээктэрэ Николай Сургаев, сонуну видеоҕа устан анал ханаалга таһаарар Борис Леонтьев, өр сылларга үтүө суобастаахтык үлэлиир, СӨ бэчээтин туйгуна, тиэхиньиичэскэй эрэдээктэр, корреспондент Наталья Захарова.
Ааҕааччыларбытыгар күүс-көмө, өйөбүл буоларгытыгар истиҥ махталбытын тиэрдэбит. Инникитин да улууспут сайдарын туһугар хардарыта с謬бээспитин быспахха үлэбит өссө бөҕөргөөн иһэригэр ¬эрэллээхпит.
Я. Иванова