Булуҥ улууһугар «Сахалыы дьыктаан” уон сыллаах үбүлүөйдээх аахсыйаҕа уопсайа 63 киһи кыттыыны ылбыт. Аахсыйа бибилэтиэкэлэр былассааккаларыгар тэриллибит.
Тиксии бибилэтиэкэтин ааҕар саалатыгар олунньу 17 күнүгэр үгэскэ кубулуйбут тэрээһиҥҥэ сахалыы төһө таба суруйалларын бэрэбиэркэлэнэ 10 киһи кэлбит.
Манна В. Федоров «Чыычаахсыт” диэн кылгас тиэкиһи аахпыт бибилэтиэкэр Вуталина Стручкова.
Дьыктааны саха тылын учуутала Найбина Горохова бэрэбиэркэлээбит.
Иилээн-саҕалаан тэрээһини ыыппыт сүрүн бибилэтиэкэр Людмила Корякина.
Бибилэтиэкэ үлэһиттэрэ биллэрбиттэринэн, дьыктаан түмүгүнэн улуус үрдүнэн “5” сыанаҕа 19 киһи суруйбут, “4” сыанаҕа – 24 киһи уонна “3”-кэ – 20. Кыттааччыларга аахсыйа түмүгүнэн Туоһу сурук туттарыллыбыт.
Ордук элбэх дьон Күһүүр нэһилиэгэр аахсыйаҕа кыттыбыт, манна 19 киһи дьыктааны суруйбут.
Таймылыырга 17 кыттааччы кэлбит.
Санатар эбит буоллахха, аахсыйа саха тылыгар дьон болҕомтотун тардыыга, сахалыы таба суруйуу үөрүйэҕин олохсутарга, иҥэрэр сыаллаах ыытыллар.
Александра Стручкова