Булуҥ улууһугар байыаннай дьайыыга сылдьар уонна кыттыыны ылбыт байыастар оҕолоругар анал болҕомто ууруллар

Дойдубут бэрэсидьиэнэ Владимир Путин Улуу кыайыы 80 сылынан сибээстээн, үүммүт сылы Арассыыйа үрдүнэн Аҕа дойдуну көмүскээччи сылынан биллэрэн, тохсунньу 15 күнүгэр уураахха илии баттаабыта, онтон Саха сирин Ил Дархана Айсен Николаев Ил Түмэҥҥэ туһаайан этиитигэр үүнэр сылы Ийэ дойдуну көмүскээччи сылынан биллэрбитэ.
Манан сиэттэрэн Ийэ дойдубутун көмүскүү сылдьар анал байыаннай дьайыы кыттыылаахтарын, хорсун-хоодуот уолаттарбытын уонна кинилэр дьиэ кэргэттэрин өйөөн, ытыктаан араас элбэх тэрээһиннэр буолаллара бэлиэтэнэр.
Ол курдук, үүммүт сыл саҥатыттан саҕалаан анал байыаннай дьайыы кыттыылаахтарын оҕолоругар анаан, оройуон дьаһалтата көҕүлээһининэн «Айхал» этнокултуурунай киин дьиэтигэр саҥа дьыллааҕы бырааһынньык тэрилиннэ, бу туһунан оройуон аҕа баһылыгын социальнай боппуруостарга солбуйааччы Айседора Винокурова иһитиннэрдэ. “Анал байыаннай дьайыы саҕаланыаҕыттан, байыаннай дьайыы кыттыылаахтарыгар, кинилэр дьиэ кэргэттэригэр араас хабааннаах көмө оҥоһуллар. Ол курдук, улуус тэрилтэлэриттэн харчы хомуллан байыастарга гуманитарнай көмө оҥоһуллар. Маны тэҥэ, анал байыаннай дьайыыга сылдьар уонна кыттыыны ылбыт байыастар оҕолоругар анаан саҥа дьыллааҕы бырааһынньык тэрилиннэ. Онно минньигэс бэлэххэ сүрүн көмөнү Ил Түмэн дьокутаата Елена Голомарева, «Алмазы Анабара» акционернай общество уонна оройуон дьаһалтата оҥордулар”, — диэн кэпсээтэ Айседора Николаевна.
Баһылыгы солбуйааччы иһитиннэрбитинэн, анал байыаннай дьайыыга сылдьар уонна кыттыыны ылбыт байыастар оҕолоро, оройуон үрдүнэн билиҥҥитэ барыта 61 оҕо баар. Кинилэргэ анал болҕомто ууруллар. Ол курдук, оҕолор оскуола иһинэн остолобуойга босхо аһылыгынан тутталлар, Тиксии иһинэн сүүрэр маршрутнай автобуска, улуус иһинэн ыытыллар култуурунай тэрээһиннэргэ босхо сылдьар кыахтаахтар, маны таһынан, киинэҕэ 20% чэпчэтиилээх сылдьар бырааптаахтар.

 

Я. Иванова