«Киирбэт күннээх Бороготтор» кинигэ икки туомнаах тахсан күн сирин көрөн бороҕоттору үөртэ. Бу үөрүүлээх түгэни оскуола оҕолоро «Омолой үрэҕэ» диэн ырыанан астылар.
Ол кэннэ нэһилиэк бибилэтиэкэтин үлэһитэ Светлана Горохова мустубут дьону кинигэ туһунан билиһиннэрдэ.
Хомуурунньукка 1929-2024 сс. Намыы сэлиэнньэтин олохтоохторун, бэтэрээннэрин уонна олорон ааспыт үтүө дьонун үлэлэрин, тус олохторун туһунан кэпсэнэр. Кинилэр бары нэһилиэк, оройуон сайдыытыгар улахан кылааттарын киллэрбит үтүөлээх дьон.
Бу икки туомнаах кинигэни нэһилиэк олохтоохторо Галина Михайловна Баланова, Светлана Николаевна Горохова, Зоя Алексеевна Новгородова, Вера Егоровна Стручкова, Раиса Афанасьевна Стручкова уонна Василина Васильевна Никонова хомуйан оҥордулар.
Мустубут дьон ааспыты ахтан, истиҥник сэҥээрэн, астынан тарҕастылар.
Я. Иванова